I ხარისხის კოქსართროზი წარმოადგენს მენჯ-ბარძაყის სახსრის ოსტეოართროზის ადრეულ სტადიას. პაციენტს შეიძლება აღენიშნებოდეს პერიოდული ტკივილი დატვირთვისას, დისკომფორტი, შებოჭილობა ან მოძრაობის მსუბუქი შეზღუდვა.
შერჩეულ პაციენტებში შეიძლება განიხილებოდეს მაღალმოლეკულური ჰიალურონის მჟავის სახსარშიდა ინექცია. პროცედურის მიზანია ტკივილის შემცირება და მენჯ-ბარძაყის სახსრის ფუნქციის გაუმჯობესება. მიღებული ეფექტი და მისი ხანგრძლივობა ინდივიდუალურია.
მენჯ-ბარძაყის სახსარი ღრმად მდებარეობს, ამიტომ ინექცია მიზანშეწონილია ჩატარდეს გამოსახულებითი, მათ შორის ულტრაბგერითი (ექოსკოპიური) კონტროლით. ექოსკოპიის საშუალებით ექიმი რეალურ დროში ხედავს შესაბამის ანატომიურ სტრუქტურებს და აკონტროლებს ნემსის მიმართულებასა და პრეპარატის სახსარში შეყვანას.
ჰიალურონის მჟავა დაზიანებულ ხრტილს სრულად ვერ აღადგენს და კოქსართროზს ვერ კურნავს. ინექციის საჭიროება ინდივიდუალურად ფასდება სიმპტომების, კლინიკური მდგომარეობისა და ჩატარებული მკურნალობის გათვალისწინებით და წარმოადგენს კომპლექსური მართვის ერთ-ერთ შესაძლო კომპონენტს.
ავტორი: ირაკლი შელია, MD, PhD — რევმატოლოგი თბილისში
