მენისკის დაზიანება — მუხლის მენისკის გაგლეჯა
მენისკის გაგლეჯა (Meniscus Tear) მუხლის ერთ-ერთი გავრცელებული დაზიანებაა. მენისკი წარმოადგენს ხრტილოვან სტრუქტურას, რომელიც მონაწილეობს დატვირთვის განაწილებაში, დარტყმის ამორტიზაციასა და მუხლის სტაბილურობის შენარჩუნებაში.
დაზიანება შეიძლება განვითარდეს მუხლის მკვეთრი მოტრიალების, სპორტული ტრავმის, ჩაჯდომისას ან ასაკთან დაკავშირებული დეგენერაციული ცვლილებების შედეგად.
ძირითადი სიმპტომებია ტკივილი მუხლის შიდა ან გარეთა მხარეს, შეშუპება, მოძრაობის შეზღუდვა, ტკაცუნი, „ჩაჭედვის“ ან მუხლის ბლოკირების შეგრძნება.
მენისკი ჩვეულებრივ რენტგენოგრაფიაზე პირდაპირ არ ჩანს. მენისკის დაზიანების შეფასების ძირითადი გამოსახულებითი მეთოდია MRI, რომელიც გვიჩვენებს დაზიანების მდებარეობას, ფორმასა და გავრცელებას და შესაძლო თანმხლებ დაზიანებებს.
მკურნალობა ინდივიდუალურია და დამოკიდებულია დაზიანების ტიპზე, ზომაზე, მდებარეობასა და სიმპტომებზე. შესაძლებელია დატვირთვის მოდიფიკაცია, ტკივილის მართვა და მიზნობრივი რეაბილიტაცია. მუხლის მუდმივი ბლოკირების, გადაადგილებული მენისკის ფრაგმენტის ან შესაბამისი სხვა ჩვენების შემთხვევაში საჭიროა ორთოპედ-ტრავმატოლოგის შეფასება და შესაძლოა ართროსკოპიული მკურნალობა.
ირაკლი შელია, MD, PhD
რეაბილიტოლოგი–რევმატოლოგი
