დილის შებოჭილობა და სახსრების ტკივილი სხვადასხვა მიზეზით შეიძლება განვითარდეს. განსაკუთრებული ყურადღებაა საჭირო, როდესაც გაღვიძების შემდეგ სახსრების მოძრაობა გაძნელებულია, აღინიშნება შეშუპება და მდგომარეობა მოძრაობის დაწყების შემდეგ თანდათან უმჯობესდება.
ხანგრძლივი დილის შებოჭილობა შეიძლება გვხვდებოდეს რევმატოიდული ართრიტის, სპონდილოართრიტის, ფსორიაზული ართრიტისა და სხვა ანთებითი რევმატული დაავადებების დროს. შედარებით ხანმოკლე შებოჭილობა შეიძლება ახლდეს ოსტეოართროზსაც.
დიაგნოზის დასადგენად მნიშვნელოვანია სიმპტომების ხანგრძლივობა, რომელი სახსრებია დაზიანებული, არის თუ არა შეშუპება და სხვა სისტემური ნიშნები. საჭიროების შემთხვევაში ტარდება სისხლის ანალიზები, სახსრების ექოსკოპია, რენტგენოგრაფია ან MRI.
თუ დილის შებოჭილობა რეგულარულად მეორდება, განსაკუთრებით თუ მას თან ახლავს სახსრების შეშუპება და ტკივილი, მიზანშეწონილია რევმატოლოგის კონსულტაცია.
ავტორი: ირაკლი შელია, MD, PhD — რევმატოლოგი-რეაბილიტოლოგი თბილისში
